منتدى كلية العلوم بدمنهور


 
الرئيسيةبوابه جديدةالتسجيلدخول

 

 أمن الدولة

اذهب الى الأسفل 
كاتب الموضوعرسالة
.general manager
المدير
المدير
.general manager

mms mms : mms
اوسمه : أمن الدولة %D9%88%D8%B3%D8%A7%D9%85%20%D8%A7%D9%84%D9%85%D8%AF%D9%8A%D8%B1

ذكر
عدد الرسائل : 3916
العمر : 101
الموقع : http://demo.ahlamontada.net
المزاج : عالى
جنسيتك : مصر
السٌّمعَة : 25
تاريخ التسجيل : 05/12/2008

أمن الدولة Empty
مُساهمةموضوع: أمن الدولة   أمن الدولة Emptyالخميس ديسمبر 18, 2008 2:23 pm

واقف عندك تعمل إيه ؟

أنا باتمشَّى ف حالي يا بيه !
هم الدنيا بيتربصبي
وانا باتعان بالمشي عليه ..
إسمك إيه ؟
والله مافاكر ..!
إسمي مواطن
إسمي مواطن مصر الصابر ..
كده كتبوني ف كل دفاتر
كفر اليُتمى ..
مركز متاعيس الشرقية!
أنا من ذات نفس المُديرية !
من مواليد الزمن الغابر
جيل الثورة والإشتركية
سمُّونا .. جيل الحُريّة
إحنا الجيل العربي الثاير
جيل الفكر الشرقي الكافر ..
جيل السد ..
ومكاسب شعب ما تنعد
جيل التأميم والإصلاح
جيل العامل والفلاح
إحنا يا باشا إللي بننحط
مطرح ما تقولوا وبالظبط
ولا حدش فينا بينحاز
ولا حدش بيفك الخط
أنا عشت الأيام السودة
كُنَّا نطفِّي النُور ف الأوضه
وقت الغارة
ونهيَّص من حارة لحارة
طفُّو النور .. طفُّو النور
وترُشِّنا بالميه .. الجارة
قالوا أنا مولود بعد الهوجة ..
ف عهد النصر !
فيه ناس قالوا ف عهد القهر..
قالوا انا جيت وف ديلي الفقر
تلاقيك عارف كل القصة !!
مش برضه سعادتك من مصر ؟؟!
مش راح أطوِّل
اُمي المرحومة فطمتني
بعود صبَّار
وانا كان عُمري يدوبك
شهر !
من يومها وأنا برضع صبر !
من يومها يا سعادة الباشا
وانا ريقي مبلوع بالصبر
يغفر ذنبك يامه يا طاهره
ويوسَّع حواليكي القبر
عُمري ما قُولت لمأمور
لأ
ولا بَعرف غير قُوُل الحق
وبصلّي ..
وفحالي تملِّي ..
ولا بأسمع أخبار اليوم
شئ ماله لزوم
لو حد إتكلم ف سياسة
بأقعد مكتوم
أو ألملم حالي وبأقوم
من غير تعليق !!
ليه بس يا باشا مجرجرني
ف محضر تحقيق ؟؟
دا أنا واحد من ضمن الفُقرا
لا بنكتب ضد ولا بنقرا
وبندعى .. للريّس دايماً
و بنهتف .. للسادة الوزرا
وخدمت الجيش
وأحلف لك :
ولا ماوعى أعيش
م الليلة..
مش حخرج تاني
بالزمَّه .. وديني
وأيماني
غير بس أدوَّر ع اللقمة
ورغيف العيش
ده أنا طيّب حاضر
ف لساني
غير بيتي ما ليش
وعيال بالكوم
ركباني هموم
كراريس ومدارس
وهدوم
والرزق بيجي بميت واسطة ..
غير كده .. ما ألقيش
وانا عايز أعيش
نفسي أهرب من الدنيا بحالها
أطفش .. ولا أجيش
الدنيا يا باشا لأمثالنا
غير صَحن الذُّل ما تدِّيش
وانا راضي وصابر
سيِّبني أروح ..
أصل أنا مش قادر
يجعل بيتك دايماً عامر.
شكلك صعلوك وبتتآمر!؟
متمسكن والدمعه ف عينك
شُغل النسوان مش حيفيدك
لو فاض صبري ح كلبش إيدك
عامل فيها البت البكر ؟؟
راسم عفَّه وطيبه وطُهر ؟؟
عُمرك شوفت نجوم الظهر ؟؟
إحنا مباحث أمن الدولة
إمش إنجر وأي مُحاولة
راح ألبِّس أهلك ميت بلّوه
أتخن منَّك بيّبُوس إيدي
يابني الشعب ده كُله عبيدي
و أي مواطن كلب بيركع
فتَّح عينك .. إفهم واسمع .
بُص سعادتك .. أنا حَلّتها !
شُوف أوراقي ..
آدي بطاقتي ..
أنا عُمرى أساساُ ما داريتها ؟!
والمسأله لو أمن الدوله ..
واجب نتجاوب في ساعتها
وتبقى بسيطه وبرضه في بيتها !!
دي تبلَّها .. تشرب ميتها .!
يا نهار أبيض !!
المختومة بختم النسر ؟؟!
حتى بطاقتي يا باشا لاغيتها ؟؟
ده أنا طول عُمري حويط ومحرَّس
لا أتلم تحرِّي ولاأتبهدل
ولا أبيِّت عندكو وأتجرس !!
كُنت ف جيبي تملِّي شايلها
زيّ هموم الدنيا .. حاملها
أتحنجل .. وليلاتي أنقلها
من فوق كتفي .. لتحت بطاطي
وأخفي ف قلبي .. وواسي مراتي
بأتصبَّر .. واهي ماشيه حياتي
سارح ف الملكوت ومطاطي ..
شكلك مش ولا بُد وواطي !.
من فضلك .. بزيادة ألاطه
وأسمع بقى منَّي على بلاطه
ح احكيلك وضعي بإخلاص
أنا راضع عزة ف أنشاص
أنا كنت مُقاتل ..
أنا دُفعة تسعه وستين
طول عُمري .. شقيان مش عاطل
وعبرت تلاته وسبعين ..
لما سعدتك كُنت بشوُرت
أنا شلت سلاحي وعبرت
أمن الدولة بروحي حميته
أمن الدولة بإيدي بنيته
كُل الدولة حدود وتراب
من دم الشُهدا أنا حنِّيته
وانا شايل فوق كتفي سلاحي
وبقايا رجال ..أشلاء ف شوال
ربَّك قدَّرني .. ولمّيتُه
وفّيت العهد إللي قطعته
روَّحت زميلي لباب بيته ..!
أمن الدولة !!؟؟
أمن الدولة تهين كرامتنا ..
وتكرَّهنا في يوم ولادتنا ؟!
أمن الدولة تدوس ف عيالها ؟؟
أمن الدولة إنك تغتالها ؟!
مين أصلا جابك للسُلطة ؟
مين عمَلَك ظابط ف الشُرطة ؟!
قولي برُتبك ليه مغرور ؟!
وانت بكُل جلالة قدرك
عبد وليك تلاتين مأمور ؟؟
ليه تفتيش .. ومباحث واقفه ؟!
وستين بوكس وفرد مرور ؟!
ومكرْدن كُل الميادين
ومقفِّل شارع وإتنين
وولاد مصر ـ براعم طالعه ـ طول السِّكه
على الصفين
ومطافي وشُرطه وإسعاف
ربيتوا الرُعب في أجيالنا
الكُل بيرجف ويخاف
وتعطَّلوا ف مصالح ناس
من غير تقدير أو إحساس
إللي وراه طيارة .. تفوته !
والمسعوف .. ولا يفرق موته !
والمرضان .. مين يسمع صوته !
جاي تقولي انا أمن الدولة ؟؟
ممكن نفهم مع بعضينا
معنى الأمن ؟؟
ممكن أشرح ؟!
من غير ما أتكلبش وأتجرَّح ؟!
أمن الدولة قانون ورقابة ..
أمن الدولة قضاء ونيابة ..
أمن الدولة نظام ع الكُل
أمن الدولة تلف سعادتك
وتجمِّل أرضها بالفُل
عز بلدنا ف أمن الدولة ..
ضل بلدنا ف أمن الدولة ..
العدل أساس أمن الدولة
أي كرامة ..
لأي مواطن دايماً أولى
لازم يبقى البيت منصان
ولا فيش مصري يبات عريان
ولا واحد يتعالج بره
وغلابه .. ببرشام ودهان
ولا واحد يتعشى بطارخ
والتاني من الجوع مغصان
ولا طفل متختخ ومكلبظ
وعيال تانية تقولش عيدان
وقصور باشوات طول سواحلنا
وبقية الشعب ف قفصان
ومدارس بتديرها أمريكا
ومدارس تانيه بتنجان
قبل ما تطلب أمن لدولة
عزز للدولة الأركان
إوجد هيبة لشأن الدولة
وإرفع سيفها ف كل ميدان
دولة تصون أولادها بخيرها
مش تخلق منهُم خصيان
دولة تفرَّحنا بموازينها
من غير تميز لإبن فلان !!
أمن الدولة يا رمز الدوله
إنَّك تحترم الإنسان .



منقول
الرجوع الى أعلى الصفحة اذهب الى الأسفل
http://demo.ahlamontada.net
 
أمن الدولة
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتدى كلية العلوم بدمنهور :: قسم الشعراء واصحاب المواهب Department of poets and talented people :: شعر و شعراء - همس القوافي Poems and poets - General Chat-
انتقل الى: