اشمعنى البنات يعني؟
--------------------------------------------------------------------------------
بسم الله الرحمن الرحيم
حاجه دايما بتزهقني
ماحكم اشتراك البنت في المنتديات ؟
ماحكم كلام البنت مع الشباب على النت؟؟
ماحكم وضع الابتسامات في المشاركات؟؟؟
نفسي اعرف ليه دايما اللي بيحطوا المواضيع دي مش بيقولوا اشتراك البنات والشباب او ماحكم كلام الشاب مع بنت على النت؟؟
اولا انا ضد الشات جدا جدا جدا وليا تحفظات كتير على المعامله مع الشباب على النت
بس مش ده سؤالي
السؤال هوا ليه دايما محسسني ان البنت او الست شيئ ناقص او معدوم التفكير او وسيله لإغواء الرجل او انها بنت هبله ومن اول كلمه حينضحك عليها في ثوانى؟
انا معاكم ان في بنات كده بس مش كل البنات هبل
وبعدين بحس دايما ان الناس لما تشوف بنت قاعده على النت تبقى اكيد بتعمل حاجه غلط وفي شباب كتير بيرفضوا بنات لأنهم بيقعدوا على النت حتى لو كانوا بيتصفحوا مواقع من غير اي مشاركه
.........
نقطه تانيه بتغيظني في عالم المتزوجات وبصراحه بتفقعلى مرارتي
دايما لما واحده تشتكي من جوزها انها مش بيقعد معاها كتير او بيحب واحده عليها او او يقولولها دايما اكيد انتى مقصره معاه
شوفي الغلط اللي فيكي وصلحيه
حتى في البرامج الدينيه
لما واحده تسأل عن مشكله من النوع ده يقولولها كده
طيب مايكونش الرجل هوا للي فعلا غلطان؟؟؟
مايمكن مراته بتعملله كل حاجه وهوا اللي راجل مش مظبوط؟
او هوا اللي مش مقدر اللي بتعلمه علشانه
انا بس نفسي اعرف ليه دايما الغلط بيحملوه على البنت؟
وليه دايما بينصحوها هيا؟؟
فتاوى النساء فتاوى النساء فتاوى النساء.............. نفسي مره اشوف فتاوى الرجال
نفسي مره اشوف منتدى فيه قسم للشباب ازاي يبقوا احسن وازاي يتعاملوا مع النساء
نادرا جدا لما الاقي موضوع مطروح للرجل عن حق الزوجه عليه وتلاقي مليون موضوع عن حق الزوج على زوجته وهوا مالا انكره وهوا اللي وصانا بيه ربنا ورسولنا الكريم صلى الله عليه وسلم
حاجه اخيره ..انا مش ضد كل الكلام اللي بيتقال للستات والبنات بالعكس ده رما يدل على اهتمام زائد بينا اكيد في مصلحتنا بس نفسي شويه اهتمام بالرجاله زي ما بيهتموا بالبنات علشان هما كمان يعرفوا اللي عليه مش اللي ليهم وبس
انا عايزه اعرف هل انا ببالغ في كلامي .. .؟؟؟؟
وللا حد فيكم شايف اللي انا شايفاه؟؟
معلش طولت عليكم بس اختكم متجوزه وجايز يكون ده سبب احساسي بالموضوع ده
منقول عن بنت
