.. :: الـحــلوه تـفــاحة للـسـفــر و الـسيــاحة :: ..

بدون مقدمات ..طبعا كلنا عارفين خفة الدم العربيه و خصوصا المصرية
و كلنا عارفين قد ايه الناس بتتشائم و بتؤمن في موضوع العين و الحسد جامد قوي
و بعد متابعه دقيقه .. لفئة السائقين
و خصوصا سائقي النقل ..



لوحظ الآتي >>> اللي تلاقيه معلق فردة شبشب في العربيه من تحت .. و لو غني حبتين بيعلق صندل .. ده طبعا غير الخمسه و خميسه و الخرزه الزرقا و كيس الكمون .. لزوم فك الاعمال
اما بقي اللي واخد " نحو" الامية
بيكتب الاتي :




{ سولار فى التنك ولا مليون فى البنك }
ده علي اساس ان القناعه كنز لا يفني .. ده قصر ديل

{ عضة اسد ولا نظرة حسد }
لاا .. جامد يا ولا .. كان شغال في سيرك

{ سلام يا بلد الكلام }
يلاا في 60 تييت .. الباب يفوت عربيه

{ الرجولة مواقف والندالة دروس }
بما ان الرجوله مواقف اكيد حتلاقيها في مواقف عبود و المنيب و القللي و ام قويق

{ لو كان الرزق بالجرى ماكانش حد حصلنى }
بيشارك في الفورميلا كثير.. يأما حرامي

{ اللى يخاف من العفريت يعمل عبيط }
طيب و يعملوها ازاي دي؟؟

{ المضطر يركب التاكسى }
بما ان ..الضطر يركب التاكسي ../ و المضطر يركب الصعب..
حاصل ضرب الطرفين = حاصل ضرب الوسطين
اذا .. التاكسي = الصعب

{ الباشا مش تلميذ }
ماهو بعد شهاده" نحو" الاميه .. بقي دكتور

{ بكره ترجع ريما من عند خالتها فى مارينا }
انا مش عارف بقي .. ده سواق و لا وزير

{ دى قصة كفاح مش جاية على المرتاح }
شكلك سواق لحلاح .. و خليك معايا صحصاح.. لحسن حديك بالمفتاح

{ ما تبصليش بعين رضية ده انا طلع عين اهلى فى السعودية }
اكيد كان شغال عند القانوبي .. طلعت عينه البنت

{ الحلوة من دمياط وعليها اقساط }
علشان تبطل تاكل مشبّك تاني .. يا طفس

{ الحلوة من حلوان وصاحبها راجل غلبان }
اتلم المتعوس علي خايب الرجي

{ إيسوزو النوزو كوانونزو }
هههههههه .. احلي جمله عجبتني

{ من حق التقيل يتدلع }
افضل ادلع لحد ما حتبور .. يا طخين

{ ان عيشت هزلكو وان مت ربنا يسهلكو }
اللي يشوفوا في الحرب يقتله

{ شوفو الجديد يا بلد التقليد }
انتا اكيد صيني .. يا مان

{ تركب معايا اسليك تنزل اولع فيك }
فاتح مقلة لب و تسالي في العربيه

{ لما كنت عصفور اكلونى ولما بقيت اسد صاحبونى }
يا كذااااب .. انت مش لسه قايل نظره حسد و لا عضه اسد

{ تعمل حسابى اقدرك تهزر معايا اعورك }
كان معكم .. المعلم ذكي قدره

{ الحلوة تفاحة للسفر والسياحة }
نزلت عالطول بعد كليب البرتقاله و العنب العنب

{ دلعها فى الغيارات وريحها على المطبات }
و بتغيرلها بأي نوع يا تري؟؟ .. كادلز و لا بامبرز .. ايه القرف ده

{ ماتقولش دى بكام دى جت بدهب المدام }
حوش حوش المحبس و الخلخال اللي كنت داخل بيهم

{ الحلوة لما تدلع تخلى الاسفلت يولع }
السواق ده بيحب قناه موليطي للاغاني

{ الحلوة خوخة جت بعد دوخة }
ده غار من اخوه بتاع التفاحه للسفر و السياحه

{ ما تبحلقش كده يا لوح دى جت بطلوع الروح }
تشكر ياسطي .. و اهو ظل لوح و لا ظل كاوتش

{ ماتبصليش كده يا عبيط الحلوة دى بالتقسيط }
و هو فيه حلوه بالتقسيط .. يا اهبل

{ مافيش صاحب يتصاحب }
مافيش كلام .. سلام يا صاحبي

{ عتاب الندل اجتنابه }
اصلي .. اكيد راكب عربيه مطلعه عينه .. نداله بقي

{ جبنا المازدا وجيبنا الزيت وهى عليها خراب البيت }
هههههههه ..انتبه .. اي شيئ مؤنث بيخرب عالطول

{ اللى امه تدعيله احسن من اللى امه تديله }
يا بركة دعاء الوالدين

{ لو كان الجرى بالرتب كان زمانى لواء }
اهي الجمله دي بقي هي اللي حتودي الموضوع في داهيه .. هو اكيد قصده " لوا لوا " اللي بيلعب في نيجريا

ههههههههههههههههه
مش عارف بيجيبوا الكلام ده منين ؟؟
يلااا.. كل واحد يتقمص دور سواق نقل
و يقول حيكتب ايه
و اهم حاجه يكون معاه شهادة
" نحو " الاميه