بحبه بس مش فى قصه حب ؟!!

أنا :شايفين اللي هناك ده
أصحابي : اه ، ماله ؟
أنا : أنا بحبه أوي
أصحابي : بتحبيه في قصة حب وكدا ؟
أنا : لأ أنا قولتلكو أنا بحبه بحبه بس ، إيه علاقه ده بقصة الحب يعني ؟
أصحابي (مع فتحه بق كدا ونظرة استغراب شديدة) : إيه ، يعني ايه؟
أنا : يعني بحبه ومش هاقوله وهانسى اني عرفته ومش هارتبط به بأى شكل من الأشكال

وقبل ما تفتح بقك عزيزي القارئ وتبدو نظرة الشك الخبيثة في عينيك
اقرا الكلمتين الجايين دول
ونبدأ بقى من أول السطر

في نوعين متعارف عليهم ومختومين ختم النسر والخروف والحمار كمان من هذا الشئ الذي يسمونه بعض البشر بالحب

النوع الأول : حب القلب
تكون ماشي مسالم وفى حالك لا بيك ولا عليك
يخرج شعاع من عين بني أدم يادوب عدى قدامك وجات عينك في عينه لمدة فسوة من الزمن، وبمجرد سقوط هذا الشعاع على إحدى خلاياك القلبيه ، بيتغير تكوينها المتعارف عليه، رغم إنك مش ممكن تعرف إيه اللي اتغير ، ولا توصفه لكل أصحابك اللي هيسألوك يومها ، (مالك يابني إيه حصلك ماحنا سايبينك كويس وزى الفل الصبح )
والحب ده زي مابدأ بسرعه أسرع من سرعه الضوء ذات نفسه ، بيعتقد بردو إن نهايته بتبقى بسرعه
الإحتمال الأول
إما بمجرد إنك تتعرف فعليا على الشخص ده وتقعد تتكلم معاه وتكتشف إنه بني أدم زي بقية البني أدمين
بيتكلم وبياكول وبيوقع على هدومه ده

الإحتمال التاني
هينتهي الحب ده أول ما تبدأ تفقد الشوق للشخص الآخر
وده لأن الحب ده أساسه الشوق واللهفة للطرف الآخر
وفقد الشوق واللهفة معناه نهاية العلاقة أصلا
أما بقى فقد الشوق واللهفة توقيته إمتى
فده هيبقى عند أول لقاء حميمي بين الطرفين وده طبعا بيبقى أصعب من الإحتمال الأول لإنه بيبقى بعد الميثاق الغليط ( الزواج ) غالبا !!

والاحتمالين دول بينطبق عليهم القول القائل :
لا شئ يقتل الحب سوى الواقع
ولا شئ يقتل الشوق سوى الجنس

ندخل بقى على النوع الثاني من الحب : حب العقل
الناس أنصار النوع ده مقتنعه تماما إن ثاني أكسيد الكربون بيعكر ماء الجير الرائق
وإن الأكسجين يساعد على الإشتعال

الناس أنصار النوع ده بتجيب ورقة وقلم
وتقعد كدا وتكتب ال18 شرط اللي عايزاهم في نصها التاني في الحياه
1- بيصلي
2- في كليه كويسة
3- مابيلبسش بنطلون ساقط
4- مثقف
5-أكبر مني بـ 10 سنين
6-.........
7-........

وهكذا
وأول ما بتلاقي حد بينطبق عليه مثلا 14 شرط من ال 18 دول
مابتسبهوش ، وبيبقى بالنسبة لها لقت نصها التاني فعلا
وبيعتقد إن الحب ده اللي بيستمر لأنه مبني على ثوابت مش بتتغير مع الزمن مهما كانت الشروط
لإنك لو كان من شروطك بنت عنيها ملونة عمرها ماهتغمق طول حياتها
ولو كنت عايز حد بيشتغل فى مجال معين عمره ماهيغير مجاله
وهكذا وكدا بيبقى فعلا نصك التاني اللي عمرك ماهتزهق معاه ولا هتحس انه مش ده اللي أنت عايزه في يوم
وهنا بتيجي حاجات تانية كتير بعد القبول طبعا اللي هوا أهم حاجة
بتيجي العشرة والمودة والرحمه والإخلاص والتقدير والإحترام
وده بيعتقد إنه أهم من ذلك الشئ الذي يسمى الحب
وبيبقى أصدق لإنك دايما هتقول لنصك التاني :أنا بحترمك جدا ، أنا فخور بيك جدا ، أنا مستعد أساعدك على تحقيق أحلامك ، أنا بتمني أعيش حياتي الباقيه معاك

لكن النوع الأول بقى هيبقى كلام من نوع
أنا أبيع حياتي كلها عشانك ( طبعا هوا أخره يبيع الشراب بتاعه )
أنت في عيني كل الدنيا ( وتلاقيه بيبص على البت اللي معديه من جنبكو )
أنا من غيرك ولا حاجة ( ولو سبتيه تاني يوم هتلاقيه نازل من بيتهم مرتاح نفسيا )
لو سبتيني أموت ( وتاني يوم بردو تلاقيه ماشي مع 7 بنات فى الكليه )
وغالبا الكلام ده بيبقى أكلشيهات محفوظة أصلا

لكن الناس المحظوظة جدااااااااااااا في حياتها بيحصل عندها النوعين دول فى نفس ذات الوقت ومع نفس ذات الشخص طبعا
ورغم ان ده نادر
فده بيبقى ليه تقدير ومكانه خاصة من كل البشر
لانهم كلهم بيطمحوا اليه

ايه الرغي ده
كفايه كدا
يالا
أنت ايه رائيك ؟؟

كلام مش موجود علي ارض الواقع يا انسه
.............................................
بعض البنات كالقرود لا يتركوم غصن الا اذا كانت اعينهم علي غصن اخر

والله عندك حق

ياريت كل واحد يوضح ردو اكتر

» قصـة واحد عصبي بحب بنت وجاي يصارحها بحبه ليها