ولو مرّة....

كتب د. مدحت أنور نافع :

أبوس إيدك تفوق يا عم لو مرة
باقولك فيه ألوف بره..
جيوش حرة..
ومالها سلاح سوى كلمة بلادى مصر
هرانا الفقر والجوع اللى ماله حصر
يا أهل القصر..
بيخرس صوت بيتكلم بداله اتنين
صحيح عايشين..
بلقمة عيش بتتغمس مع المسامير
بشقة فول بتتدمس مع الصراصير
بقالنا كتير؟
خلاص مابقتش باحسبها حساب الناس
دا كل ماييجى يحسبها نفر ينداس!
ما هو العباس..
بيحلف إنه ما بيحكمش غير للناس
بصوت الناس..
ورب الناس ما قولتش رأيى بالمرة
أمانة عليك ترد يا عم لو مرة
وسيبك من هباب الطين..
بشر قالعين
وبالكورة وعالكورة اتصرف ملايين
تبص يا سيدى لعيالك تشوف حرمان
تزور عمك تزور خالك تشوف أحزان
تكونش مفكّر إن بلادنا للأعيان؟
وللفاسدين وللشلة ولابن فلان؟
أنا عن نفسى مش حاقدر
وحاخرج بره ويّا الناس
ومش حاسكت ويتقال إن أنا محلاس
عشان بكره عيالى يقولوا كان راجل
مافاتش الحق وادّارى فـ طابور العيش
ولا فـ جنسية من بره وخلع م الجيش
الهى تعيش..
تعالى معايا نصرخ صرخة لجل الله
نقول الله..
نغيّر مصر بإيدينا ومش بالصوت
ولو بالموت..
حنفضل مصر لعيالنا وشرفنا يعود
دى لو رجعت لنا بالصدفة مش حتجود
ولا عايزينها تيجى بالدعى والدين
ولا نكنس عليها الست والواصلين
بكلّم مين؟
دا ماتش الكورة كل عقلك وليه نطيت؟
عشان الشوطة مش حلوة وجت فى الحيط؟
يا ريتك كنت تعملها ولو مرة
عشان ترجع لنا حرة
ومن بره
يشوفها الناس يقولوا رجعت الدرة
ولو مرة.. ولو مرة

* خبير اقتصادى