عيل غلس"....بجد !!يا ابني انت غلس ودي الحقيقة ما تنكرهاش بقى !!

السلام عليكم ورحمة الله وبركاته




انا حابه اني اتناقش معاكم في الموضوع ده تحديداً ...

وربنا يستر

واتمنى ان الموضوع يلاقي استحسان وتفاعل

____________________________________________


الموضوع المرة دي ...عن رؤية ...من زاوية اخرى ...


مش من زاويتي ...انا عارفة اني قبل ما اتكلم في الموضوع ده

انه احتمال ...انا باقول (احتمال) ...وباقول (بعض) ...الصفات حد يشترك معايا فيها ...



طيب ...ندخل في الموضوع ....
_________________________________________________


ايه يا ابني الغلاسة والغتاتة اللي انت فيها دي




انت طول الوقت قاعد لوحدك ...في اوضدتك ومع نفسك ...في ايه ؟؟؟

بتعمل ايه ؟؟؟


- : يعني هاكون باعمل ايه ؟؟؟ ..الحمد لله يا اما باصلي ...او بأقرأ قرآن
او قاعد قدام الكمبيوتر وباتصفح الانترنت


- انتر....ايييييييه ....بتعمل ايه ان شاء الله على الانترنت بالساعات

- بتكلم مين على الانترنت

- : يعني هاكون باكلم مين يعني ؟؟
ما انا لو باكلم حد هاقول على طول

- انا باتصفح الانترنت زي الجريدة ...
وباكتب موضوعات في المنتدي
او ان في ناس بتكتب موضوعات وباكتب لهم ردود وكل الناس بتشوفها



- وهي الحياااااااااة كلها انترنت انت حتى ما بتخرجش

- : امال اعمل ايه يعني ؟؟؟ وبعدين انا مش باحب الخروج الكتير اصلا

- : الحمد لله رب العالمين ...مش كلها انترنت ...الانترنت في وقت الفراغ وبس ...

- : الحمد لله رب العالمين بفضل الله ...باصلي وباصوم ..وباقرأ قرآن على اد ما باقدر ...وباحاول اني احفظ القرآن ...وربنا يارب يقدرني ويوفقني ان شاء الله


- : والحيااااااااة والناس الطبيعية ...انت مش بتيجي تقعد معانا ...

- : طيب ما احنا بنقعد مع بعض على الغدا

- : طيب تعالى اتفرج معانا على التليفزيون ...


- : ماهو اصل انا ماليش نفس ...وبعدين انا مش باحب المسلسلات العربي اللي انتوا بتشوفوها ...

انا باحب الافلام الاجنبي ..

- : يعني هو احنا ما نعرفش نقعد معاك شوية ونتكلم معاك ...انت مش ابننا يعني ولا ايه يا ابني

- : احم ... هانتكلم في ايه ...ماهو اصل بصراحة مافيش موضوعات مشتركه ما بينا

- انتوا مش بتقبلوا كلامي وبتعتبروه كله غلط في غلط ...وانا بصراحة باختلف معاكم في وجهات نظركم ...


وبينتهي الموضوع بخلاف

- احم ...فالافضل ...تجنب الحوارات

- وبعدين بقى انتوا بتكونوا مستنيين اما آجي من بره علشان تشكوا لي من خلق الله كلهم

- وانا باعمل ايه ...يا ريتني افيد ...

- انا مجرد مستمع فقط لا غير


- والناس اللي انتوا بتشتكوا منها دي ...ولا تهمني ولا بتيجي في بالي اساساً ...ناسيهم

- انتوا كمان ولا تخلوا الناس دي بالكم ...

- واذا متضايقيين منها اوي ...خلاااااص خدوا موقف منهم بينوا ان الامور وتصرفات الناس دي معاكم مش عاجباكم لاني لو في مكانكم هاعمل كده على طول


- : الواد ده عبيط ولا اهبل ... ...ربنا رزقنا بعيل اهبل
وغلس ...كماااااان ...ده عيل خنقة


- : انا اعرف هو ليه ما طلعش زي اخوه ...بيحب يهزر ...ويدلعنا ويوافقنا على كل حاجه ...حتى لو غلط ...مش غتت وبيعلق على كل حاجه وكل صغيرة وكبيرة وكل فعل وتصرفات ...واللي ما يعجبوش يقفل معاه ...

-: اما عيل قفل صحيح


- : يا ماما ويا بابا ...انا صريح ...واللي ما يلزمنيش ...ما اتعاملش معاه ...
واللي يلف ويدور عليا ويتخابث عليا ...مش باتعامل معاه اصلا ...كويس ان قلت له (سلام عليكم )


- : يا ابني انت بطريقتك دي مش هاتعرف تعيش ...وبعدين اللي يتخابث عليك ...اتخابث عليه انت كمان ...اتعامل معاه بنفس طريقته

- : والله ...ما اعرفش مش باعرف اتعامل مع حد بنفس اسلوبه


- : انت ولا حد في اخواتك كده ...

- : يمكن علشان انا الوسطاني ...

- ربنا يشفيك يا ابني




__________________________________________________ _________








الحوار ده ...اعتقد انه بيحصل ...

والله اعلم ...

الحوار ده طبعا ..لا انكر ان جزء كبير منه بيحصل معايا انا شخصياً ...


والحقيقة ...يا جماعه ...انا باعترف ...يمكن اكون (عيل غلس) من وجهة نظر الاسرة ...

لان محبكاها زيادة عن اللزوم ...ولان فعلا مش بالاقي حوار مشترك ...نتكلم فيه مع بعض

ولان ردود افعالي غير ردود افعالهم تجاه المواقف والناس ...


هما بحكم الخبرة في الحياة ...

وانا بحكم الحياة على كوكب اخر غير كوكب الارض بتاعنا


__________________________________________________ __


سؤالي ....هل في حد بيشترك معايا الى حد ما في نفس الصورة في بيته ؟؟؟



انا عارفة ان في ناس هاتنتقد الصورة ...

بس يا جماعه قبل ما نفكر في الحكم والنقد ...

خلونا نفكر مع بعض في نقطتين ...


1. الابن مطيع وابن ناس ...وبيبوس ايدين ابوه وامه كمان ...لكن لا ينكر الخلاف الفكري ما بينهم ...ازاي نقدر نخلق حوار مشترك ..الابن نفسه يلاقي نفسه في الكلام ...مش عارف
- الابن ...حاسس انه مختلف ...مختلف عن اخواته ...مختلف في اسلوبه في الحياة ...مختلف في كل حاجه ...

لحد ما بدأ يحس انه (متخلف ) ...او (مشكلة ) بالنسبة لابوه وامه ...

- احساس الابن انه (مشكلة) ...ازمه نفسياً ...هو بيتجنب الكلام معاهم لانه بالنسبة لهم (مرفوض) ...
- شخص (مرفوض) فكرياً ...وشخص مرفوض في الاسلوب ...خايف يتكلم لانه عارف ومتأكد انه هايترفض ...

( لأ ..لأ ...ده مش عريس )


2. النقطة التانية ...الجانب الاخر ...الابن ده فعلا ...مش باحبه زي باقي اولادي ...لانه مش قريب مني زيهم ...
الابن ده مشاكس ...كل حاجه معترض ...
واعتراضه ده ...خروج عن طوعنا ...الاولاد (ملك الاب والام ) يعملوا اللي هما عاوزينه فيه ...
ابوه وامه هما اللي يمشوه ...

لكن ده ماشي من دماغه ...

- اياك يفلح في حياته ...خليه يورينا شطارته بقى ...

- سؤالي ... انت خلقت مشكلة ...من انك بقيت (مشكلة) ...لانك مختلف عن اخواتك ...ولانك حتى محاولاتك انك تبقى شبههم ...مش بتنفع ...يا ترى تعمل ايه في حل المشكلة ؟؟؟

- وياترى هاتتخلى عن اصحابك ؟؟ وانترنتك ؟؟ علشان تحل المشكلة دي؟؟


- هل ممكن تتخلى عن مبدأ الصراحة ...لحد الوقاحة والبجاحة ...الصراحة بحدة ...علشان ترضي الناس

الصراحة = الحق والعدل ...

بصي بداية موضوعك جامد والحوار اللي حكتيه بيتكرر كتير
كل جيل مش عاجبه الجيل اللي بعده شيء طبيعى
كون ان الواحد مختلف عن اخواته دي حاجة عادية
كل واحد ليه شخصيته المستقلة والمختلفة
من حق اهلنا انهم يخافوا علينا من التطور السريع ف زمنا ده
معاكي انهم ساعات بيتدخلوا ف حياتنا بطريقة تخنق بس لازم نعذرهم
مشكلة التواصل معاهم صعبة مش مستحيلة
بتقولي بيعترضوا على وجهة نظرنا دا مش لو لقيتي موضوع مشترك اصلا
دا كل فرد في الاسرة ليه اهتمامات مختلفة عن التاني
ايه الصعب انك تحاولي تقنعيهم باراءك ف اي موضوع يطرحوه
هما كدا كدا رايك مش حيعملوا بيه ومش بعيد يسخروا منه
بس اديك حتسمعيهم وتعرفي بيفكروا ازاي وهما كمان حيعرفوا بتفكري ازاي ونبقى عملنا اللي علينا وقعدنا معاهم ربع ساعة ونرجع نكمل قعاد ع النت
ف نفس الوقت مينفعش نمشي من دماغنا لازم نتواصل مع اللي حوالينا
مش معنى كدا نفاق لا يا سيتي خلي عندك صراحة بس مش حد الوقاحة
يعني قولي اللي جواكي ورايك باسلوب ميجرحش اللي قدامك

مثلا لو عندك ضيوف مش بطقيهم تعملي اه
تدخلي تسلمي بابتسامة خفيفة ايوة بابتسامة بغض النظر انهم ناس خنقة ابتسامتك في وجه اخيك صدقة دا مش نفاق لانك مش حتقولي قدامهم حاجة ومن وراهم حاجة تانية انتي حتسبيهم وتكملي قعدة مع اصحابك ع النت

اسفة اني طولت عليكي بس بجد انا كان نفسي اتكلم ف الموضوع ده

شكرا علي مرورك الجميل

موضوع جيد

ميرسي علي مرورك

اية التوبيك الجامد دة انا راى الوسط ف التعامل يعنى مش انعزل عنهم علشان مش موافقهم ف الراى ولا اوافقهم ف الراى وخلاص من غير حتى تفكير او ابداء للشخصية يمكن هما صح او انا صح لازم يكون فية تيادل ف الراى وف الحوار علشان الحياة تستمر

ما انا قلت ان بعض المواقف بس هي اللي بتحصل معانا مش كلها
مرورك هو اللي اجمد يا نهي وحشتيني وعاوزه اشوفك