موضوع جااامد

موضوع: موضوع جااامد الأربعاء مارس 24, 2010 3:29 pm

الموضوع ده جامد آخر حاجه وفي شويه كلمات جامده كيك هتخليك تقول ههههه وإنت بتقراها

وبعد ما تخلص الموضوع هتكتبلنا لول عشان نعملك بلوك من الجروب الفكسان ده

الجمله اللي فاتت دي جمعت فيها خمس كلمات بيستفزوني وفي ناس بتقولها من غير ما تعرف

معناها وفي ناس تانيه بيتضايقوا بس مش عارفين يعملو فيها إيه ,

والكلمات هي ( هههههههههه - آخر حاجه - لول - كيك - فكسان )

وسوف نناقش كل كلمه بالتفصيل المستفز

أولا كلمه هههههههههههههههههههههههههههههههههههههههههه

حاول تنطقها كده ... أنا جيت أنطقها لاقيت نفسي بعمل حاجه إسمها شهيق وهي عمليه سحب

الأكسجين اللازم للتنفس داخل الرئتين , المهم أنا جيت عند حرف الهه الخامس ونفسي إتقطع

معرفتش أكمل نطقها , بقيت أسأل نفسي هو أنا نفسي قصير ! بس أنا مش بدخن وكل الناس دي

بتكتبها أكيد كلهم بينطقوها ,أنا لازم أنطقها ,وبعد طول تفكير توصلت إني ممكن أعمل حاجه إسمها

زفير بعد الشهيق عشان أكمل نطقها (الزفير هي عمليه التخلص من ثاني أكسيد المنجنيز المترسب

في الرئتين), رحت واخد شهيق جامد جبت معاه ست حروف هه وبعدين زفير وراه فيه خمس حروف

تانيين يبقي كده حداشر حرف هه والجمله اللي فوق لسه مكملتش !! حسيت إني بنهج جامد , سألت

نفسي هي كل الناس اللي بتقراها بتنهج كده ! ده إيه السخافه دي ! هو كل ما أقراها هنهج كده !

مش معقول يعني

طيب ده كان نطقها , تعالو نروح لمعناها ,

أنا عامل أككونت علي الفيس بوك من بعد ما إتعمل بتلت ساعه , كنا سبعه بس علي الفيس بوك ,

أنا وإتنين من أمريكا وتلاته من أوكرانيا وواحده من أسبانيا كله عمللها آاد ما عدا أنا, المهم من

ساعه ما عملت الفيس بوك لحد دلوقتي مش عارف معني كلمه ههههههههههه دي

إنت ممكن تنرفز واحد أو تشتمه يقوم كاتبلك هههههههههههه

وممكن تكتبله نكته يقوم كاتبلك ههههههههههههههههههههه

وممكن تقوله إنت عامل إيه يقولك الحمد لله تمام ويرزعلك بعدها ههههههههه

وممكن تكتب لواحد كلمه إنجليزي ميعرفش معناها يكتبلك هههههههههههه

وناس كتيره أوي بقي بتقولها في أي حته وفي أي كوممنت وفي أي موضع من غير سبب وإحنا

يطلع عيننا في النطق لما ننهج ونعرق وفي الآخر مش عارفين معناها , طب ليه السخافه

والسذاجه , ! يعني الواحد ينهج عشان ينطق كلمه ملهاش معني ! اللي مش عارف معني كلمه

ميكتبهاش !!

ثانيا كلمه كيك

كتير بنسمع الجمل دي ,

الموبايل ده جامد كيك , العربيه دي جامده كيك , ...

إشمعني كيك ؟ ليه ميكونش زلط , ما إنت لو إتحدفت بزلطه في نافوخك هتعرفك إنها أجمد من

الكيك بكتير , واحد هيقوللي لأ إحنا بنقول كيك عشان هو جامد وطعمه حلو , طب ليه ميكونش

جاتوه ؟ ده حتي طعمه أحسن !! ولا إحنا بنقلد وخلاص ,

ثالثا كلمه لول وهذه الكلمه يستخدمها المسلمين والكفار في جميع أنحاء العالم وتكتب بالعربي

وبالإنجليزي

انا أول واحد كاتبهالي بالإنجليزي سألته يعني إيه كلمه لول ؟ قاللي مش عارف ! عملتله ريموف

مرتين في ساعتها

يومين لقيت واحد تاني كاتبلي لول , معناها إيه يا حبيبي ؟ مش عارف , بس هي بتتكتب بدل

الضحكه يعني , طب إنت مين كاتبهالك ؟ قاللي واحد مش عارف معناها برضو ! قلتله إديني إسمه ,

وعملتله آاد عشان أعملهم ريموف هما الإتنين مع بعض ..

عدا سنتين , تلاته , الناس عندي علي الأككونت عددها قل من خمسين ألف إلي خمسه من عشره

قلت لو مشيت علي النظام ده مش هيبقي عندي حد علي الأككونت خالص , لازم أسأل حد يكون

بيفهم , عملت آاد لكام واحد أجنبي كده وبسأل أول واحد كتبلي لول
excuse me , could u tell me wt's tha meanin' of this word ?
كتبلي
i dunno S: ya3ny mesh 3aref ,

عملتله ريموف هو كمان وفضلت تقريبا حوالي سبع سنين من بعد ما الفيس بوك إتعمل عشان

أعرف إن معناها إختصار ل:
laugh out loud

وعلي الرغم إن طلع ليها معني إلا أنها غير معبره وسخيفه حتي أحمد مكي أما قالها في فيلمه ده

كان بيتريق علي الراجل اللي كان بيستظرف معاه , يا ريت نخف منها شويه عشان الكلمه مش لذيذه

خالص , ومحدش يجي يستظرف ويقوللي مش لذيذه إيه هيا شيكولاته !!!

رابعا , كلمه فكسان

لا تتعجب يوما إذا تغير اسم درس سعفان الكسلان إلي سعفان الفكسان

كل الناس بتقولها !!

تلاقي واحد نازل علي السلم رايح المدرسه مامته تقوله , حساب لا رجليك تفكس منك وإنت نازل

علي السلم تقع تتفكس علي وشك تعض فكسان في البيت متعرفش تروح المدرسه المفكوسه لمده

شهرين فاكسانين , يقولها حاضر ويفكسلها

الكلمه إنتشرت أكتر من الأنفلوانزا وكل الناس إتعدت منها حتي أنا , أيوه أنا بقولها عشان كده مش

هتكلم فيها كتير , ومش معني كده إني موافق عليها ..أنا بس إتعديت من اللي بيقولوها

فاكسا وفكيسا :
أو خامسا وأخيرا : كلمه آخر حاجه

كلمه فكسانه برضو ولو حطينها في جمل باللغه العربيه هيبان إفتكاسها , تعالو نشوف

ضرب عمرو زيد ضربا مبرحا آخر حاجه فبكي زيد بصوت عالي آخر حاجه ثم جاءت أمهم فضربتهم

معا بعصا طويله آخر حاجه فبكوا جميعا لمده طويله آخر حاجه ,

قال المتحدث الرمسي لمنظمه الصحه العالميه أن مرض أنفلوانزا الخنازير سريع الأنتشار ويجب

الإحتراس والوقايه منه جيدا فهو مرض خطير آخر حاجه.

أعلنت هيئه الأرصاد الجويه أنه سوف تهب رياح شماليه جنوبيه علي محيط البحر المتوسط وسوف

يفر السمك البلطي المتواجد في بحر النيل إلي صحراء سيناء وذلك لشده الرياح التي ربما قد تكون

عاصفه شديدة آخر حاجه , كما أعلن مدير هيئه الأرصاد أنه سوف يبدأ إرتداء الجاكيت من بدايه

الشتاء حتي لو كانت الشمس حارقه والبحار جافه , كما أرغم العاملين علي فعل ذلك وهو

يصيح بصوت عالي آخر حاجه " الشغل شغل "

شفتو الجمل آلشه إزاي ومينفعش تتقال

:)

علي العموم عاايز اشوف في حد معترض معايا علي الكلمات دي ولا كله بيقولها

م
ن
ق
و
ل

» موضوع لبكره
» موضوع مهم جدا جدا لينا كلنا
» موضوع جامد ليك يا..........
» موضوع خطير جدا
» موضوع يستحق الحذف